ଭିଜିଲାନ୍ସ ଜାଲରେ ରାଜସ୍ବ ନିରୀକ୍ଷକ ଦେବାଶିଷ ମାଝୀ
ଭିଜିଲାନ୍ସ ଜାଲରେ ରାଜସ୍ବ ନିରୀକ୍ଷକ । ଗଞ୍ଜାମ ଜିଲ୍ଲା କୋଦଳା ତହସିଲ ଅନ୍ତର୍ଗତ କେ ବରିଡ଼ା ଆର୍ ଆଇ ଦେବାଶିଷ ମାଝୀ ୫୫ ହଜାର ଟଙ୍କା ଲାଞ୍ଚ ମାଗିଥିବା ଅଭିଯୋଗରେ ଧରା ପଡିଥିବା ସୂଚନା ମିଳିଛି । ଅଭିଯୋଗ ଆଧାରରେ ବୁଧବାର ବ୍ରହ୍ମପୁର ଭିଜିଲାନ୍ସ ଟିମ୍ କେ ବରିଡ଼ାରେ ସଂପୃକ୍ତ ଆର୍ ଆଇଙ୍କୁ ରେଡ୍ ହ୍ୟାଣ୍ଡ ଧରିଛନ୍ତି । କେ ବରିଡ଼ା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରେ ଭିଜିଲାନ୍ସ ଟିମ୍ ଚଢ଼ାଉ କରିଛି । ସୂଚନା ମୁତାବକ, ପୂର୍ବରୁ ଆର୍ ଆଇ ଦେବାଶିଷଙ୍କ ନାମରେ ବିଭିନ୍ନ ଅଭିଯୋଗ ହୋଇ ଆସୁଥିଲା । ଗତ ୨ ଦିନ ତଳେ ଗୋଟିଏ ବାଲି ଟ୍ରକକୁ ଜବତ କରିଥିଲେ ଆର୍ ଆଇ । ଟ୍ରକର ସମସ୍ତ ନଥିପତ୍ର ଠିକ୍ ଥିବା ସତ୍ତ୍ୱେ ତାଙ୍କୁ ଅର୍ଥ ଦାବି କରିଥିଲେ ଆର୍ ଆଇ । ଆର୍ ଆଇ କେ ବରିଡ଼ା ଅଞ୍ଚଳର ଟ୍ରକ ମାଲିକ ଅଜୟ କଅଁରଙ୍କ ବାଲି ଗାଡିକୁ ଜବତ କରିବା ସହିତ ରାଜସ୍ବ ଆଦାୟ ବାବଦରେ ୩୦ ହଜାର ଟଙ୍କା ଏବଂ ଲାଞ୍ଚ ବାବଦରେ ୨୫ ହଜାର ଟଙ୍କା ଦାବି କରିଥିଲେ । ଏ ନେଇ ଟ୍ରକ୍ ମାଲିକ ଅଜୟ ବ୍ରହ୍ମପୁର ଭିଜିଲାନ୍ସ ବିଭାଗରେ ଅଭିଯୋଗ କରିଥିଲେ । ଟ୍ରକ୍ ମାଲିକଙ୍କ ଅଭିଯୋଗ ମୁତାବକ ଯୋଜନା କରିଥିଲେ ଭିଜିଲାନ୍ସ ଟିମ୍ । ତେବେ ଆଜି ଟ୍ରକ ମାଲିକ ଆର୍ ଆଇଙ୍କୁ ତାଙ୍କ କାର୍ଯ୍ୟାଳୟରେ ଟଙ୍କା ଦେଉଥିବା ବେଳେ ଭିଜିଲାନ୍ସ ବିଭାଗ ମାଡି ବସିଥିଲା । ଆର୍ ଆଇଙ୍କ ଘର ପୁଇଁତଳା ବୋଲି ସୂଚନା ମିଳିଛି । ଅପରପକ୍ଷେ ଅଧିକ ତଦନ୍ତ ପାଇଁ ଭିଜିଲାନ୍ସ ଟିମ୍ ତାଙ୍କୁ ଭଡା ଘର ସମେତ ନିଜର ପୈତୃକ ଘରକୁ ନେବ ବୋଲି ସୂଚନା ମିଳିଛି ।
ବେଗୁନିଆପଡାରୁ ବାପୁନି କୁମାର ମାଲୁ
