୮ଟି ଶ୍ରେଣୀର ଦେଢଶହ ପିଲାଙ୍କ ପାଇଁ ଶିକ୍ଷକ ସଂଖ୍ୟା ୩, ଅନ୍ଧକାରରେ ରହିଛି ପିଲାଙ୍କ ଭବିଷ୍ୟତ

ସରକାରୀ ବିଦ୍ୟାଳୟ ପ୍ରତି ଛାତ୍ରଛାତ୍ରୀଙ୍କୁ ଆକୃଷ୍ଟ କରାଇବାକୁ ରାଜ୍ୟ ସରକାର ୫-ଟି ଅଧିନରେ ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା । ଦେଖା ସୁନ୍ଦର ବଉଳା ଗାଇ ଭଳି ରହିଯାଉଛି ଶିକ୍ଷା ବ୍ୟବସ୍ଥା । ବିଦ୍ୟାଳୟ ତ ରୂପାନ୍ତରିକରଣ ହେଉଛି, ହେଲେ ଭିତରେ ଶିକ୍ଷା ବ୍ୟବସ୍ଥା କେମିତି ହେବ ସେଥିପ୍ରତି କାହାର ନଜର ନାହିଁ । ବିଦ୍ୟାଳୟ ଅଛି ହେଲେ ଶିକ୍ଷକ ନାହାନ୍ତି । ଏମିତିରେ କେମିତି ପିଲାଙ୍କ ଭବିଷ୍ୟତ ଗଢି ହେବ ତାକୁ ନେଇ ଚିନ୍ତାରେ ଅଭିଭାବକଙ୍କ ସହ ସ୍ଥାନୀୟ ବାସିନ୍ଦା । ଆଉ ପିଲାଙ୍କ ଭବିଷ୍ୟତକୁ ସୁଦୃଢ କରିବାକୁ ଅଂଟା ଭିଡି ସରକାରଙ୍କୁ ବିଦ୍ୟାଳୟର ସମସ୍ୟା ସମ୍ପର୍କରେ ଜଣାଇବା ଲାଗି ତତଲା କଂକ୍ରିଟ ଉପରେ ବସି ବିକ୍ଷୋଭ କରୁଛନ୍ତି ଛାତ୍ରଛାତ୍ରୀ, ଅଭିଭାବକ ଓ ଗ୍ରାମବାସୀ । ଶିକ୍ଷା ପାଇଁ ଛାତ୍ରଛାତ୍ରୀଙ୍କ ଏଭଳି ବିକଳ ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲା ଓଡାପଡା ବ୍ଲକ ଅନ୍ତର୍ଗତ ସାରିଆପଡା ସ୍ଥିତ ଉଚ୍ଚ ପ୍ରାଥମିକ ବିଦ୍ୟାଳୟରେ ।

ସାରିଆପଡା ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଥିବାବେଳେ ସେଠାରେ ପାଠ ପଢନ୍ତି ଦେଢଶହରୁ ଅଧିକ ଛାତ୍ରଛାତ୍ରୀ । ହେଲେ ବିଦ୍ୟାଳୟରେ ଶିକ୍ଷକ ସଂଖ୍ୟା ମାତ୍ର ୩ । ସେଥିମଧ୍ୟରୁ ଜଣେ ପ୍ରଧାନ ଶିକ୍ଷକ ଥିବାବେଳେ, ଜଣେ ରେଗୁଲାର ଶିକ୍ଷକ ଅଛନ୍ତି । ଆଉ ଅନ୍ୟଜଣେ ଶିକ୍ଷକ ଡେପୁଟେସନରେ ଅଛନ୍ତି । ତେଣୁ ବିଦ୍ୟାଳୟର ଭାର ଦୁଇ ଜଣ ଶିକ୍ଷକଙ୍କ ଉପରେ ନ୍ୟସ୍ତ । ପିଲାଙ୍କୁ ଉନ୍ନତ ଶିକ୍ଷା ଯୋଗାଇବା ଲାଗି ଅଧିକ ଶିକ୍ଷକ ନିଯୁକ୍ତି ଦାବି ନେଇ ସ୍ଥାନୀୟ ଲୋକପ୍ରତିନିଧିଙ୍କ ସମେତ ଗ୍ରାମବାସୀ, ଜିଲ୍ଲା ତଥା ଗୋଷ୍ଠୀ ଶିକ୍ଷା ଅଧିକାରୀଙ୍କୁ ଜୁଲାଇ ୨୧ ତାରିଖରେ ଲିଖିତ ଭାବେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ଆସନ୍ତା ସାତ ଦିନ ଭିତରେ ଶିକ୍ଷକ ନିଯୁକ୍ତି କରିବା ପାଇଁ କର୍ତୁପକ୍ଷ ପ୍ରତିଶ୍ରୁତି ଦେଇଥିଲେ ହେଁ ତାହା ପୂରଣ ହୋଇପାରିଲା ନାହିଁ । ଫଳରେ ବାଧ୍ୟ ହୋଇ ବିଦ୍ୟାଳୟ ଗେଟ୍ ସମ୍ମୁଖରେ ତାଲା ପକାଇ ଧାରଣା ଦେଲେ ଅଭିଭାବକଙ୍କ ସମେତ ଗ୍ରାମବାସୀ ଏବଂ ଲୋକପ୍ରତିନିଧି ।

ଏ ବାବଦରେ ଆମ ପ୍ରତିନିଧି ଜିଲ୍ଲା ଶିକ୍ଷା ଅଧିକାରୀଙ୍କ ପ୍ରତିକ୍ରିୟା ନେବା ପାଇଁ ଚେଷ୍ଟା କରିଥିଲେ କିନ୍ତୁ କୌଣସି ପ୍ରତିକ୍ରିୟା ମିଳି ପାରିନଥିଲା । ପରେ ଓଡାପଡା ଗୋଷ୍ଠୀ ଶିକ୍ଷା ଅଧିକାରୀ ଶାନ୍ତୁନୁ ମଲ୍ଲିକଙ୍କୁ ଫୋନ୍ ଯୋଗେ ଯୋଗାଯୋଗ କରିବାରୁ ସେ କହିଛନ୍ତି ଯେ, ଆମେ ପ୍ରପୋଜାଲ ଦେଇଛୁ ଯଥାଶୀଘ୍ର ସମାଧାନ ହେବ । ତେବେ ଦେଖାଯାଉ ପରବର୍ତ୍ତୀ ସମୟରେ ଆମ ସରକାର ସାରିଆପଡା ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ଛାତ୍ରଛାତ୍ରୀଙ୍କ ଭବିଷ୍ୟତ ପାଇଁ କି ପଦକ୍ଷେପ ଗ୍ରହଣ କରୁଛନ୍ତି ।

ଓଡାପଡାରୁ ଗୋପବନ୍ଧୁ ବାରିକ