ଜଳାଭିଷେକ ପାଇଁ ଚଳଚଞ୍ଚଳ କୋରାପୁଟ ଜିଲ୍ଲାର ପ୍ରସିଦ୍ଧ ଶୈବପୀଠ ବାବା ଗୁପ୍ତେଶ୍ଵର ଧାମ

ଶ୍ରାବଣ ମାସରେ ଜଳାଭିଷେକ ପାଇଁ ଚଳଚଞ୍ଚଳ କୋରାପୁଟ ଜିଲ୍ଲାର ପ୍ରସିଦ୍ଧ ଶୈବପୀଠ ବାବା ଗୁପ୍ତେଶ୍ଵର ଧାମ । ଦୀର୍ଘ ଦୁଇ ବର୍ଷ ହେବ କରୋନା କଟକଣା ଯୋଗୁଁ କାଉଡିଆମାନେ ବାବାଙ୍କ ପୀଠରେ ଜଳାଭିଷେକ କରିବାରୁ ବଞ୍ଚିତ ଥିଲେ । ଚଳିତ ବର୍ଷ କଟକଣା ହଟିବା ପରେ ପୁଣି ଚଳଚଞ୍ଚଳ ହୋଇ ଉଠିଛି ବାବା ଗୁପ୍ତେଶ୍ଵରଙ୍କ ପୀଠ । ବୈପାରିଗୁଡା ବ୍ଲକର ୩୮ କିମି ପାହାଡ଼ ଜଙ୍ଗଲ ଘେରା ରାସ୍ତାରେ ଏକ ଗୁମ୍ଫା ମଧ୍ୟରେ ଗୁପ୍ତରେ ଅବସ୍ଥାପିତ ବାବା ଗୁପ୍ତେଶ୍ଵର । ବାବାଙ୍କ ଦର୍ଶନ ପାଇଁ ଲକ୍ଷ ଲକ୍ଷ ଭକ୍ତ ଏବଂ ଶ୍ରଦ୍ଧାଳୁଙ୍କ ଭିଡ଼ ଲାଗି ରହିଥାଏ । ବହୁ ଦୂର ଦୁରାନ୍ତରୁ ଭକ୍ତମାନେ ଆସି ଜୟପୁର ପାତ୍ରପୁଟ ନଦୀରୁ ଜଳ ଉଠାଇ ଗୁପ୍ତେଶ୍ଵର ବାବାଙ୍କ ନିକଟରେ ଜଳାଭିଷେକ କରନ୍ତି । ଏଥିପାଇଁ ରାସ୍ତାର ପ୍ରତି ଛକ ଛକରେ ଅନେକ ସଂଗଠନ କାଉଡ଼ିଆ ଭକ୍ତଙ୍କୁ ସମସ୍ତ ପ୍ରକାର ମାଗଣା ସେବା ଯୋଗାଉଛନ୍ତି । ଶ୍ରାବଣ ମାସ ଦ୍ଵିତୀୟ ସୋମବାରରେ  ଜିଲ୍ଲା ତଥା ରାଜ୍ୟ ବାହାରୁ ମଧ୍ୟ ହଜାର ହଜାର କାଉଡ଼ିଆଙ୍କ ସମାଗମ ଦେଖିବାକୁ ମିଳିଛି । ତେବେ ବାବାଙ୍କ ଦର୍ଶନ କରି ଭକ୍ତଙ୍କ ବେଶ୍ ଖୁସି ଅନୁଭବ କରିଥିବା ବେଳେ ଅତିସୁନ୍ଦର ବ୍ୟବସ୍ଥା ହୋଇଥିବା ନେଇ ପ୍ରଶଂସା କରିଛନ୍ତି ।

ପ୍ରତିବର୍ଷ ବାବା ଗୁପ୍ତେଶ୍ଵରଙ୍କ ଧାମରେ ଲକ୍ଷ ଲକ୍ଷ ଭକ୍ତ ଏବଂ ଶ୍ରଦ୍ଧାଳୁଙ୍କ ଭିଡ଼ ଜମୁଥିବାବେଳେ ଏ ନେଇ ପ୍ରଶାସନ ତରଫରୁ ଭକ୍ତଙ୍କ ଦର୍ଶନ ପାଇଁ ସ୍ୱତନ୍ତ୍ର ବ୍ୟାରିକେଟ୍ ନିର୍ମାଣ ହୋଇଛି । ଅପରପକ୍ଷେ ରାମଗିରିଠାରୁ ୧୩ କିମି ଘାଟି ରାସ୍ତାର ଉଭୟ ପାର୍ଶ୍ଵ ଘଞ୍ଚ ଜଙ୍ଗଲରେ ପରିପୂର୍ଣ୍ଣ ହୋଇଥିବାବେଳେ ସେଠାରେ ଅଲୋକୀକରଣ ବ୍ୟାବସ୍ଥା କରିବାକୁ ସାଧାରଣରେ ଦାବି ହୋଇଛି । ଶ୍ରାବଣ ମାସ ପାଇଁ କାଉଡିଆ ଭକ୍ତଙ୍କ ସୁବିଧା ପାଇଁ କିଛି ସଂଗଠନ ତରଫରୁ ରାସ୍ତାର ଉଭୟ ପାର୍ଶ୍ଵରେ ଥିବା ଗଛରେ ରେଡିୟମ ଲାଇଟ ଲଗାଯାଇଛି । ମନ୍ଦିରରେ ଭକ୍ତଙ୍କ ପୂଜାର୍ଚ୍ଚନା ପାଇଁ ସମସ୍ତ ବନ୍ଦୋବସ୍ତ କରାଯିବା ସହ ପୂଜା ପାଇଁ ୪ଜଣଙ୍କୁ ନିୟୋଜିତ କରାଯାଇଥିବା କହିଛନ୍ତି ମୁଖ୍ୟ ପୂଜକ ।

କୋରାପୁଟରୁ ବିଘ୍ନେଶ୍ବର ଷଡଙ୍ଗୀ