ଚଳିତ ବର୍ଷ ହାତୀ ଆକ୍ରମଣରେ ହିନ୍ଦୋଳ ବନାଞ୍ଚଳରେ ୭ ଜଣଙ୍କ ପ୍ରାଣହାନି ଘଟିଛି

ହାତୀ ଆକ୍ରମଣରେ ଚାଲିଗଲା ୧୪ ବର୍ଷର ନାବାଳକର ଜୀବନ । ଚଳିତ ବର୍ଷ ହାତୀ ଆକ୍ରମଣରେ ଏହି ନାବାଳକଙ୍କୁ ମିଶାଇ ହିନ୍ଦୋଳ ବନାଞ୍ଚଳରେ ୭ ଜଣଙ୍କ ପ୍ରାଣ ହାନି ଘଟିଛି । ମଣିଷ ମୃତ୍ୟୁକୁ ରୋକିବା ପାଇଁ ବନବିଭାଗୀୟ ପଦକ୍ଷେପ ଆଖିଦୃଶିଆ ହୋଇପାରି ନାହିଁ । ହିନ୍ଦୋଳ ବନାଞ୍ଚଳରେ ହାତୀ-ମଣିଷ ଲଢେଇରେ କେତେବେଳେ ହାତୀ ମରୁଛନ୍ତି ତ କେତେବେଳେ ମଣିଷ । ହେଲେ ବନ ବିଭାଗର କାର୍ଯ୍ୟକଳାପକୁ ନେଇ ଏବେବି ଚିନ୍ତାରେ ସ୍ଥାନୀୟବାସିନ୍ଦା । ବିଭାଗୀୟ ଉଚ୍ଚ କର୍ତ୍ତୃପକ୍ଷ ଘଟଣାପ୍ରତି ଦୃଷ୍ଟି ଦେବାକୁ ସାଧାରଣରେ ଦୃଢ଼ ଦାବି ।
ବଣୁଆ ହାତୀ ଆକ୍ରମଣରେ ଏବେ ପୁଣି ଜଣେ ନାବାଳକର ଜୀବନ ହାନିକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ଏଭଳି ଅଭାବନୀୟ ଘଟଣା ଘଟିଛି ହିନ୍ଦୋଳ ବନାଞ୍ଚଳ ଓ ବାଲିମ ଥାନା ଅନ୍ତର୍ଗତ ସଞ୍ଜପଡା ପଞ୍ଚାୟତର ରକଲା ଗ୍ରାମରେ । ମୃତକ ହେଲେ ରକଲା ଗ୍ରାମର ରମେଶ ମହାପାତ୍ର ପୁତ୍ର ନରେନ୍ଦ୍ର ମହାପାତ୍ର । ସୂଚନା ଅନୁସାରେ ନରେନ୍ଦ୍ର ସନ୍ଧ୍ୟାରେ ଗ୍ରାମ ନିକଟବର୍ତ୍ତୀ ମା ବ୍ରାହ୍ମଣୀ ଦେବୀ ପିଢ଼ ପାର୍ଶ୍ଵରେ ଥିବା ନାଳକୁ ଯାଇଥିଲେ । ସେହି ସମୟରେ ହଠାତ୍ ହାତୀ ପଲ ମଧ୍ୟରୁ ଏକ ଦନ୍ତା ହାତୀ ନରେନ୍ଦ୍ରଙ୍କୁ ଏକାକୀ ପାଇ ତାଙ୍କ ଉପରକୁ ଆକ୍ରମଣ କରିଥିଲା । ଫଳରେ ଘଟଣା ସ୍ଥଳରେ ହିଁ ନରେନ୍ଦ୍ରଙ୍କର ପ୍ରାଣବାୟୁ ଉଡିଯାଇଥିଲା । କିଛିକ୍ଷଣ ପରେ କିଛି ଗ୍ରାମବାସୀ ନାଳ ଦିଗକୁ ଯିବାବେଳେ ସେଠାରେ ନରେନ୍ଦ୍ରଙ୍କର କ୍ଷତ ବିକ୍ଷତ ମୃତ ଦେହ ଦେଖି ପରିବାର ଲୋକଙ୍କୁ ଜଣାଇଥିଲେ ।
ଅପରପକ୍ଷେ ଖବର ପାଇବା ପରେ ମଧ୍ୟ ବିଳମ୍ବିତ ରାତ୍ରି ସୁଦ୍ଧା ପୋଲିସ କି ବନବିଭାଗର କୌଣସି ଅଧିକାରୀ କି କର୍ମଚାରୀ ଘଟଣା ସ୍ଥଳରେ ପହଞ୍ଚି ନଥିଲେ, ଯାହାକୁ ନେଇ ଜନ ଅସନ୍ତୋଷ ଦେଖିବାକୁ ମିଳିଥିଲା । ପରଦିନ ସକାଳେ ବନବିଭାଗର କିଛି କର୍ମଚାରୀ ଓ ବାଲିମ ପୋଲିସ ସେଠାରେ ପହଞ୍ଚି ଶବ ଜବତ କରିବା ସହ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ ନିମନ୍ତେ ହିନ୍ଦୋଳ ଡାକ୍ତରଖାନାକୁ ପଠାଇ ତଦନ୍ତ ଜାରି ରଖିଛି । ତେବେ ଦେଖିବାକୁ ବାକି ରହିଲା ଆଉ କେତେ ଜୀବନ ଗଲା ପରେ ବନ ବିଭାଗ ଲୋକଙ୍କ ସୁରକ୍ଷାକୁ ନେଇ ତତ୍ପରତା ଦେଖାଇବ ।

ଢେଙ୍କାନାଳରୁ ଗୋପବନ୍ଧୁ ବାରିକ ଓ ହିନ୍ଦୋଳରୁ ସୁଜିତ କୁମାର ବେହେରା