ଯେଉଁ ମା’ ଜନ୍ମ ଦେଇଥିଲା, ଆଜି ସିଏ କୋକେଇରେ । ଆଉ କୋକେଇକୁ ପଠାଇବା ବାଲା ଆଉ କେହି ନୁହେଁ ତାର ନିଜ ସନ୍ତାନ ।
ଯେଉଁ ମା’ ଜନ୍ମ ଦେଇଥିଲା, ଆଜି ସିଏ କୋକେଇରେ । ଆଉ କୋକେଇକୁ ପଠାଇବା ବାଲା ଆଉ କେହି ନୁହେଁ ତାର ନିଜ ସନ୍ତାନ । ଦିନେ କୋଳେଇ, କାଖେଇ ବଡ଼ କରିଥିଲା, ହେଲେ ଶେଷରେ ତା’ର ହିଁ ଜୀବନ ନେଇଗଲା ପୁଅ । ଏପରି ଅଭାବନୀୟ ଘଟଣା ଘଟିଛି କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା ଶୁକରପଡା ପଞ୍ଚାୟତରେ । ମୃତା ମହିଳା ହେଉଛନ୍ତି ଗୌରାଙ୍ଗ ଚରଣ ସ୍ୱାଇଁଙ୍କ ପତ୍ନୀ ପ୍ରମିଳା ସ୍ୱାଇଁ । ଘରେ କେହି ନଥିବା ବେଳେ ମା’କୁ ପନିକିରେ ଅତ୍ୟନ୍ତ ନୃଶଂସ ଭାବେ ହତ୍ୟା କରିଛି ପୁଅ ଜିତେନ୍ଦ୍ର ସ୍ୱାଇଁ ।
ଗୌରାଙ୍ଗ ଚରଣ ସ୍ୱାଇଁଙ୍କର ଜିତେନ୍ଦ୍ର ଗୋଟିଏ ବୋଲି ପୁଅ ଥିବା ବେଳେ ସେ କୌଣସି କାମଧନ୍ଦା କରୁ ନ ଥିଲେ । ସବୁବେଳେ ଘରେ ବସି ରହୁଥିବାରୁ ପରିବାରରେ ଅଶାନ୍ତି ଲାଗି ରହୁଥିଲା । ଏପରିକି ମା’ ପୁଅଙ୍କ ମଧ୍ୟରେ ଏହାକୁ କେନ୍ଦ୍ର କରି ପୂର୍ବରୁ ଝଗଡ଼ା ଲାଗି ରହୁଥିଲା । ଘଟଣାକୁ କେନ୍ଦ୍ର କରି ଘରେ ମା ଏକାକୀ ଥିବାବେଳେ ଜିତେନ୍ଦ୍ର ପନିକି ସାହାଯ୍ୟରେ ପ୍ରମିଳାଙ୍କୁ ଆକ୍ରମଣ କରି ଫେରାର ହୋଇଯାଇଥିବା ସୂଚନା ମିଳିଛି । ତେବେ ଖବର ପାଇ ନିଶ୍ଚିନ୍ତକୋଇଲି ଥାନା ପୋଲିସ ଘଟଣା ସ୍ଥଳରେ ପହଂଚି ପ୍ରମିଳା ସ୍ୱାଇଁଙ୍କୁ ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ୧୦୮ ଆମ୍ବୁଲାନ୍ସ ଯୋଗେ ନେଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ନିଶ୍ଚିନ୍ତକୋଇଲି ପୋଲିସ ତଦନ୍ତ ଆରମ୍ଭ କରିଛି।
କଟକରୁ ଅଭୟ ଜେନା
