ବ୍ରଜରାଜନଗରରେ ପୁଣି ଉଡିଲା ବିଜେଡି ବାନା । ୬୬ ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି ବିଜେଡି ପ୍ରାର୍ଥୀ ଅଳକା ମହାନ୍ତି

ବ୍ରଜରାଜନଗରରେ ପୁଣି ଉଡିଲା ବିଜେଡି ବାନା । ୬୬ ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି ବିଜେଡି ପ୍ରାର୍ଥୀ ଅଳକା ମହାନ୍ତି । ଚଳିତ ନିର୍ବାଚନରେ ୨୦୧୪ ପରେ ପ୍ରଥମଥର ପାଇଁ ୨ୟ ସ୍ଥାନ ଅକ୍ତିଆର କରିଛି କଂଗ୍ରେସ । ବିଜେପିର ରାଧାରାଣୀଙ୍କୁ ପଛରେ ପକାଇ କଂଗ୍ରେସ ପ୍ରାର୍ଥୀ କିଶୋର ପଟେଲ ଦ୍ବିତୀୟ ସ୍ଥାନ ଅକ୍ତିଆର କରିଛନ୍ତି । ଏହି ନିର୍ବାଚନରେ ଅଳକା ମହାନ୍ତିଙ୍କୁ ମୋଟ୍ ୯୩ ହଜାର ୭୯୦ ଭୋଟ୍ ମିଳିଛି । ତେବେ କିଶୋର ପଟେଲଙ୍କୁ ୨୭ହଜାର ୫୬୫ ଭୋଟ୍ ଏବଂ ବିଜେପିର ରାଧାରାଣୀ ପଣ୍ଡାଙ୍କୁ ୨୨ହଜାର ୩୧୬ ଭୋଟ୍ ମିଳିଛି ।

ସବୁଠୁ ବଡ କଥା ହେଲା, ଲଗାତାର ଉପ-ନିର୍ବାଚନରେ ବିଜେଡି କେବଳ ବିଜୟୀ ହେଉନି ବରଂ ବିଜୟର ବ୍ୟବଧାନ ମଧ୍ୟ ବଢି ବଢି ଚାଲିଛି । ୨୦୧୯ ନିର୍ବାଚନରେ ବ୍ରଜରାଜନଗରରେ ବିଜେଡି ମାତ୍ର ୧୨ ହଜାରରୁ ଅଧିକ ଭୋଟରେ ବିଜୟୀ ହୋଇଥିଲା । କିନ୍ତୁ ଉପ-ନିର୍ବାଚନରେ ୬୬ ହଜାରରୁ ଅଧିକ ଭୋଟ ବ୍ୟବଧାନରେ ବିପୁଳ ବିଜୟ ହାସଲ କରିଛି ବିଜେଡି । ଆଉ ଏହି ବିଜୟ ସହ ଉପ-ନିର୍ବାଚନରେ ବିଜେଡିର ବିଜୟରଥ ଆଗକୁ ବଢିଛି ।

୨୦୧୯ ପରେ ବିଜେଡି ୪ଟି ଉପ-ନିର୍ବାଚନ ପାଇଁ ମୈଦାନକୁ ଓହ୍ଲାଇଛି । ଆଉ ଏହି ୪ଟି ଉପ-ନିର୍ବାଚନରେ ସାଧରଣ ଜନତା ବିଜେଡି ଉପରେ ନିଜର ଆସ୍ଥା ପ୍ରକଟ କରିଛନ୍ତି । ବିଜେଡି ମୁଖିଆ ନବୀନଙ୍କ ସ୍ୱଚ୍ଛ ଭାବମୂର୍ତ୍ତି ହିଁ ଦଳ ପାଇଁ ସବୁଠୁ ବଡ ଭୋଟବ୍ୟାଙ୍କ ଭାବେ ଉଭା ହୋଇଛି । ଯାହାର ଫାଇଦା ଦଳକୁ ବିଭିନ୍ନ ସମୟରେ ମିଳିଛି ।

୨୦୧୯ ନିର୍ବାଚନ ପରେ ପ୍ରଥମଥର ପାଇଁ ବିଜେପୁର ଉପ-ନିର୍ବାଚନକୁ ଓହ୍ଲାଇଥିଲା ବିଜେଡି । ନବୀନ ବିଜେପୁର ଆସନ ଛାଡିବା ପରେ ଏହି ଆସନରୁ ମୈଦାନକୁ ଓହ୍ଲାଇଥିଲେ ରୀତା ସାହୁ । ଆଉ ଏଥିରେ ବିଜେଡିକୁ ମିଳିଥିଲା ବିପୁଳ ସଫଳତା । ରେକର୍ଡ ଭୋଟରେ ବିଜୟୀ ହୋଇଥିଲା ବିଜେଡି । ଏହାପରେ ବାଲେଶ୍ୱର ସଦର ଓ ତିର୍ତ୍ତୋଲ ଆସନରେ ହୋଇଥିବା ଉପ-ନିର୍ବାଚନରେ ବିଜେଡିକୁ ମିଳିଥିଲା ବଡ ସଫଳତା । ଏପରିକି ବିଜେପି ଖାତାରେ ଥିବା ବାଲେଶ୍ୱର ସଦର ଆସନକୁ ବିଜେଡି ନିଜ ଅକ୍ତିଆରକୁ ଆଣିଥିଲା । ସେହିଭଳି ପିପିଲି ବିଧାୟକ ପ୍ରଦୀପ ମହାରଥୀଙ୍କ ଦେହାନ୍ତ ପରେ ଖାଲି ହୋଇଥିବା ଆସନକୁ ପୁଣିଥରେ ଅକ୍ତିଆର କରିଥିଲା ବିଜେଡିରୁ ପ୍ରାର୍ଥୀ ହୋଇଥିବା ରୁଦ୍ର ମହାରଥୀ । ଆଉ ଏବେ ବ୍ରଜରାଜନଗର ଉପ-ନିର୍ବାଚନରେ ଏହାର ପୁନରାବୃତ୍ତି ଦେଖିବାକୁ ମିଳିଛି ।