ମହିଳା ବିଜନେସ ମେଳାର ସଫଳତା ପରେ ଜାତୀୟ ସ୍ତରରେ ମେଳା ଆୟୋଜନ କରିବାକୁ ଯାଉଛି ଆଇଡବ୍ଲୁଇସି
ଭୁବନେଶ୍ୱରରେ ଓଡିଶା ବିଜନେସ ମେଳା-୨୦୨୨ର ସଫଳତା ପରେ ଜାତୀୟ ସ୍ତରରେ ମେଳା ଆୟୋଜନ କରିବାକୁ ଯାଉଛି ଆଇଡବ୍ଲୁଇସି । ଏହି ସଂଗଠନ ଓଡିଶା ମଡେଲ ଉପରେ ଆଧାର କରି ମହିଳା ଉଦ୍ୟୋଗୀଙ୍କୁ ନେଇ ବାଙ୍ଗୋଲୋର, ମୁମ୍ବାଇ, ଦିଲ୍ଲୀ,କୋଲକାତା ଓ ପୁଣେରେ ମହିଳା ବିଜନେସ ମେଳା କରିବାକୁ ଯୋଜନା ରଖିଛି । ଭୁବନେଶ୍ୱର ଜନତା ମଇଦାନରେ ଆୟୋଜିତ ମହିଳା ବିଜନେସ ମେଳା ବେଶ ସଫଳତା ହାସଲ କରି ଏକ ମାଇଲ ଖୁଣ୍ଟ ସ୍ଥାପନ କରିଛି ।
ଭୁବନେଶ୍ୱରରେ ହୋଇଥିବା ମେଳାରେ ୧୫୦ଟି ଷ୍ଟଲକୁ ପ୍ରାୟ ୨ଲକ୍ଷ ଲୋକ ବୁଲି ଦେଖିଥିଲେ । ୫ଦିନ ଧରି ହୋଇଥିବା ମହିଳା ବିଜନେସ ମେଳାରେ ସାଢେ ୪ କୋଟି ଟଙ୍କାର ବ୍ୟବସାୟ ହୋଇଥିଲା । ଏହା ସହ ଆର୍ଥିକ ବର୍ଷରେ ୧୨ କୋଟି ଟଙ୍କା ସମ୍ଭାବନା ଥିବା ନୂତନ ବ୍ୟବସାୟ ସୁଯୋଗ ଆଣିଦେଇଛି । ଏହି ମେଳା ଦ୍ୱାରା ରାଜ୍ୟର ବିଭିନ୍ନ ମହିଳା ସ୍ୱୟଂ ସହାୟକ ଗୋଷ୍ଠୀ ନିଜର ବ୍ୟବସାୟକୁ ପ୍ରଶସ୍ତିକରଣ କରିବା ସହ ବିଭିନ୍ନ ସଂସ୍ଥାମାନଙ୍କ ଦ୍ୱାରା ବାଣିଜ୍ୟସ୍ତରରେ ଯୋଡ଼ି ହୋଇପାରିଛନ୍ତି ।
ଏଥିରେ ବଲିଉଡ଼ ଅଭିନେତା ଅର୍ଜୁନ ରାମପାଲ, ଅଭନେତ୍ରୀ ଲାରା ଦତ୍ତା ଓ ବଲିଉଡ଼୍ ନିର୍ଦ୍ଦେଶକ ଇମତିଆଜ୍ ଅଲ୍ଲୀ ଏବଂ ମହିଳା ସଦସ୍ୟଙ୍କ ଯୋଗଦାନ ମେଳାର ପରିଚୟକୁ ଆହୁରି ଉପରକୁ ନେଇଯାଇଛି । ମେଳା ଶେଷ ହେବା ପୂର୍ବରୁ ଅନ୍ୟ ରାଜ୍ୟରେ ମେଳା ଆୟୋଜନ ପାଇଁ ପ୍ରସ୍ତାବ ଆସିଛି । ଆସନ୍ତା ଜୁନ ମାସରେ ମହିଳା ଉଦ୍ୟୋଗୀ ପରିଷଦରେ ଆଉ ୧୦୦ ମହିଳା ଉଦ୍ୟୋଗୀ ଯୋଡି ହେବେ ବୋଲି ସୂଚନା ମିଳିଛି ।
