ସରକାର ଆମ ଆଡେ ଟିକେ ଦୃଷ୍ଟି ଦିଅ !

ପାଖରେ କେହିଁ ନାହାନ୍ତି । ବାପା ମା ଭାଇ ପର କରି କେବେଠାରୁ ଚାଲିଗଲେଣି । ପାଖରେ ଅଛି ଦିବ୍ୟାଙ୍ଗ ଝିଆରୀ । ଆଉ ଏହି ଝିଆରୀକୁ ନେଇ ଖୋଲା ତମ୍ବୁ ତଳେ ଆଶ୍ରୟ ନେଇଛନ୍ତି ଏହି ମହିଳା । ଇଏ ହେଉଛନ୍ତି ପି ମଣି କୁମାରୀ । ବୟସ 45 । ପରିବାର କହିଲେ କେବଳ ଦିବ୍ୟାଙ୍କ ଝିଆରୀ । ଘରଡିହ ବୋଲି କିଛି ନାହିଁ । ସକାଳ ହେଲେ ପେଟ ପୋଷିବା ପାଇଁ ମଣିକୁମାରୀ ନିକଟସ୍ଥ ହାଟରୁ କିଛି ପରିବା ଆଣି ବିକ୍ରି କରନ୍ତି । ଆଉ ସେଥିରେ ଦୁଇ ପ୍ରାଣୀଙ୍କ ଆହାର ଯୋଗଡ ହୋଇଯାଏ । ତେବେ ଏମାନଙ୍କ ଏପରି ଅବସ୍ଥା ଦେଖି ନିକଟସ୍ଥ କନକ ପରମେଶ୍ୱରୀ ମନ୍ଦିର କମିଟି ପକ୍ଷରୁ ରାତ୍ରିରେ ମନ୍ଦିରେ ବାରଣ୍ଡାରେ ଆଶ୍ରୟ ନେବା ଲାଗି ବ୍ୟବସ୍ଥା ହୋଇଯାଇଛି । ଏ ଦୃଶ୍ୟ ହେଉଛି କୋରାପୁଟ ଜିଲ୍ଲା ବୋରିଗୁମ୍ମା ଗ୍ରାମର ।

ଦେଶ ତଥା ରାଜ୍ୟରେ କେହି ଯେମିତି ଗୃହହୀନ ନ ରୁହନ୍ତି ସେଥିପାଇଁ କେନ୍ଦ୍ର ତଥା ରାଜ୍ୟ ସରକାରଙ୍କ ପକ୍ଷରୁ ଅନେକ ଯୋଜନା ପ୍ରଣୟନ ହୋଇଛି । ହେଲେ ଏ ଦୃଶ୍ୟ ସରକାରଙ୍କ ଏହି ଯୋଜନାକୁ ଅଟ୍ଟହାସ୍ୟ କରୁଥିବା ଭଳି ମନେ ହେଉଛି । ତେବେ ସରକାରୀ ଯୋଜନା ଏମାନେ କିଛି ପାଇ ନାହାନ୍ତି ତାହା କହିବା ସରକାରଙ୍କ ପ୍ରତି ଅବମାନନା ହେବ । ସରକାରୀ କଳର ବାବୁମାନେ ମଣିକୁମାରୀ ଏବଂ ତାଙ୍କ ଦିବ୍ୟାଙ୍କ ଝିଆରୀ ପାଇଁ 25 କିଲୋ ଚାଉଳ ସହ ମାସିକ 500 ଟଙ୍କା ଭତ୍ତା ଦେବାର ବ୍ୟବସ୍ଥା କରି ଦେଇ ନିଜ କର୍ତ୍ତବ୍ୟ ସାରି ଦେଇଛନ୍ତି । ହେଲେ ଏହି ବାସହରା ମହିଳାଙ୍କ ପାଇଁ ଘର ଖଣ୍ଡିଏ ଦେବାର ବ୍ୟବସ୍ଥା ଆଜି ପର୍ଯ୍ୟନ୍ତ ହୋଇପାରିଲା ନାହିଁ । ଦୀର୍ଘ 3 ବର୍ଷ ହେବ ମଣିକୁମାରୀ ଘର ପାଇଁ ବାରମ୍ବାର ପ୍ରଶାସନିକ ଅଧିକାରୀଙ୍କ କାର୍ଯ୍ୟାଳୟକୁ ଦୌଡି ଦୌଡି ଥକି ଗଲେଣି । ମାତ୍ର ଆଜି ଯାଏଁ ତାଙ୍କ ଗୁହାରୀ ଏସି ରୁମରେ ଥିବା ସରକାରୀଙ୍କ ବାବୁଙ୍କ କାନରେ ପଡିଲା ନାହିଁ । ଅପରପକ୍ଷେ ମଣିକୁମାରୀଙ୍କୁ ଘର ଯୋଗାଇବା ଲାଗି ପୂର୍ବତନ ଜିଲ୍ଲା ପରିଷଦ ସମସ୍ତ ପ୍ରକାର ଦସ୍ତାବିଜ ବିଡିଓଙ୍କୁ ଦେଇଥିବାବେଳେ ତୁରନ୍ତ ତାଙ୍କୁ ଘର ମିଳିଲେ ଦୁହେଁ ଶାନ୍ତିରେ ରହିବେ ବୋଲି କହିଛନ୍ତି । ତେବେ ଦେଖିବାକୁ ବାକି ରହିଲା ମଣିକୁମାରୀଙ୍କ ଏଭଳି ଅବସ୍ଥାକୁ ଦେଖି ପ୍ରଶାସନ କି ପଦକ୍ଷେପ ଗ୍ରହଣ କରୁଛନ୍ତି ।

ବୋରିଗୁମ୍ମାରୁ ବିଘ୍ନେଶ୍ୱର ଷଡ଼ଙ୍ଗୀ