୨୦ ହଜାର ୨୮୬ ଭୋଟ ବ୍ୟବଧାନରେ ବିଜୟ ମୁକୁଟ ପିନ୍ଧିଲେ ବ୍ରହ୍ମପୁର ମେୟର ପ୍ରାର୍ଥୀ ସଂଘମିତ୍ରା ଦଳେଇ
ବ୍ରହ୍ମପୁର ମହାନଗର ନିଗମରେ ବାଜିଲା ଶଙ୍ଖ । ବିଜେଡି ମେୟର ପ୍ରାର୍ଥୀ ସଂଘମିତ୍ରା ଦଳେଇ ବିଜୟୀ । ବିଜେଡି ପ୍ରାର୍ଥୀ ସଂଘମିତ୍ରା ଦଳେଇ ୨୦ ହଜାର ୨୮୬ ଭୋଟ ବ୍ୟବଧାନରେ ବିଜୟ ମୁକୁଟ ପିନ୍ଧିଛନ୍ତି । ବିଜେପିର ସବିତା ସୁଆର ଓ କଂଗ୍ରେସର ମଞ୍ଜୁ ରଥଙ୍କୁ ହରାଇ ମେୟର ପଦ ହାତେଇବାରେ ସକ୍ଷମ ହୋଇଛନ୍ତି ସଂଘମିତ୍ରା ।
ବିଜୟ ପରେ ବ୍ରହ୍ମପୁର ମେୟର ପ୍ରାର୍ଥୀ ସଂଘମିତ୍ରା ଦଳେଇ ସମସ୍ତ ସଫଳତାର ଶ୍ରେୟ ମୁଖ୍ୟମନ୍ତ୍ରୀ ଏବଂ ବିଜେଡିକୁ ଦେଇଛନ୍ତି । ଭୁବନେଶ୍ୱର, କଟକ ଓ ବ୍ରହ୍ମପୁର ମହାନଗର ନିଗମ ମେୟର ପଦ କିଏ ହାତେଇବ ତାହା ଉପରେ ଥିଲା ସମସ୍ତଙ୍କ ନଜର । ବ୍ରହ୍ମପୁର ମେୟର ପଦ ବିଜେଡି ହାତକୁ ଯାଇଥିବା ବେଳେ ଏବେ ଭୁବନେଶ୍ୱର ଓ କଟକରେ କିଏ ବାଜିମାତ କରୁଛି ତାହା ଉପରେ ସମସ୍ତଙ୍କ ନଜର । ଉଭୟ ଭୁବନେଶ୍ୱର ଓ କଟକରେ ବିଜେଡିର ମେୟର ପ୍ରାର୍ଥୀ ସୁଲୋଚନା ଦାସ ଓ ସୁବାସ ସିଂ ଆଗୁଆ ଅଛନ୍ତି ।
ସୂଚନାଯୋଗ୍ୟ, ସଂଘମିତ୍ରା ଦଳେଇ ୨୦୦୩ ମସିହାରେ କଂଗ୍ରେସ ଟିକେଟରେ କାଉନସିଲର୍ ଭାବେ ନିର୍ବାଚିତ ହୋଇଥିଲେ । ପରେ ସେ ୨୦୦୮ରେ ମଧ୍ୟ କଂଗ୍ରେସ ଟିକେଟରେ କାଉନସିଲର୍ ଭାବେ ନିର୍ବାଚିତ ହୋଇଥିଲେ । ତେବେ ୨୦୧୧ରେ ସଂଘମିତ୍ରା କଂଗ୍ରେସ ଦଳ ଛାଡ଼ି ବିଜେଡିରେ ଯୋଗ ଦେଇଥିଲେ । ୨୦୧୩ରେ ବିଜେଡି ଟିକେଟରେ ଜିତି ସେ ବ୍ରହ୍ମପୁର ମହାନଗର ନିଗମର କର୍ପୋରେଟର୍ ଭାବେ ନିର୍ବାଚିତ ହୋଇଥିଲେ ।
୩ ମହାନଗର ନିଗମ ସମେତ ୧୦୫ ପୌର ପରିଷଦ ନିମନ୍ତେ ଆଜି ଭୋଟ ଗଣତି ଚାଲୁ ରହୁଛି । ଅଧିକାଂଶ ସ୍ଥାନରେ ବିଜେଡି ସିଟ୍ ହାତେଇ ସାରିଥିବା ବେଳେ ବହୁ ଜାଗାରେ ଆଗରେ ରହିଛି । ପଛରେ ପଡ଼ି ଯାଇଛନ୍ତି ବିଜେପି, କଂଗ୍ରେସ । ପଞ୍ଚାୟତ ନିର୍ବାଚନରେ କ୍ଲିନ୍ ସୁଇପ କରିଥିବା ବିଜେଡି ଏଥର ବି ବାଜିମାତ କରିବ ବୋଲି ଆକଳନ କରାଯାଉଛି ।
