ଯିଏ କାମ କରିବ ତାକୁ ବିଜୟ ମୁକୁଟ ଆମେ ପିନ୍ଧାଇବୁ, ଭୋଟରଙ୍କ ପ୍ରତିକ୍ରିୟା

ଶେଷ ହୋଇଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ । ପଞ୍ଚାୟତ ନିର୍ବାଚନ ସରୁ ସରୁ ଏବେ ପୁଣି ପୌର ନିର୍ବାଚନ ପାଇଁ ବିଗୁଲ ବାଜିଛି । ଚଳିତ ମାର୍ଚ୍ଚ ୨୪ରେ ଭୋଟ ଗ୍ରହଣ ହେବାକୁ ଥିବାବେଳେ ୨୬ରେ ଭୋଟ ଗଣତି ହେବ । ଏ ନେଇ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ସରିଥିବା ବେଳେ ବିଭିନ୍ନ ରାଜନୈତିକ ଦଳ ପକ୍ଷରୁ ଅଙ୍କ କଷା ମଧ୍ୟ ଆରମ୍ଭ ହୋଇଛି । କିଏ କେଉଁ ଦଳର ପ୍ରାର୍ଥୀ ହେବ ସେ ନେଇ ମଧ୍ୟ ତାଲିକା ପ୍ରସ୍ତୁତି ହେଉଛି  l ୱାର୍ଡ କାଉଁସିଲର ଏବଂ ଚେୟାରମ୍ୟାନ ପଦବୀ ପାଇଁ ଆସାୟୀ ପ୍ରାର୍ଥୀଙ୍କ ସଂଖ୍ୟା ବଢିବାରେ ଲାଗିଥିବାବେଳେ ବିଭିନ୍ନ ଦଳ ପକ୍ଷରୁ ପ୍ରାର୍ଥୀ ଚୟନର ତାଲିକା ମଧ୍ୟ ପ୍ରସ୍ତୁତ ହୋଇଥିବା ସୂଚନା ମିଳିଛି l

ଜନତା ଜନାର୍ଦ୍ଦନଙ୍କ ମୌଳିକ ଅଧିକାର ପାଇଁ ଲଢେଇ ତେଜୁଥିବା ବେଳେ ଆମ ପ୍ରତିନିଧି ସୁନୀଲ ଦାଶ କୋରାପୁଟର କୋଟପାଡ଼ ବିଜ୍ଞାପିତ ଅଞ୍ଚଳବାସୀଙ୍କ ସମସ୍ୟା ସମ୍ପର୍କରେ ଜାଣିବା ପାଇଁ ସେଠାରେ ପହଞ୍ଚିଥିଲେ । ତେବେ କୋଟପାଡ ବିଜ୍ଞାପିତ ଅଞ୍ଚଳ ଅନ୍ତର୍ଗତ 5ଟି ୱାର୍ଡର ଜନସାଧାରଣ ଏକଜୁଟ ହୋଇ ଚଳିତ ଥର ମତଦାନ ଦେବେ ନାହିଁ ବୋଲି ଆମ କ୍ୟାମେରା ସମ୍ମୁଖରେ ସ୍ପଷ୍ଟ କହିଛନ୍ତି । ରାସ୍ତା ନାହିଁ ତ ଭୋଟ ନାହିଁ । ଯେ କୌଣସି ଦଳ ନିର୍ବାଚନ ପୂର୍ଵରୁ ନୂଆଗଡରୁ ଆସନା ଗ୍ରାମକୁ ସଂଯୋଗ କରୁଥିବା ସ୍ମଶାନ ରାସ୍ତା ତିଆରି କରିବ ଆମେ ତାକୁ ହିଁ ଭୋଟ ଦେବୁ ବୋଲି ଦୃଢୋକ୍ତି କରିଛନ୍ତି ୱାର୍ଡବାସୀ ।

ସୂଚନା ଅନୁସାରେ ଦୀର୍ଘ 30 ବର୍ଷ ହେବ ଉକ୍ତ ଅଞ୍ଚଳର ସମସ୍ୟାର ସମାଧାନ ହେଉନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ପୂର୍ଵଥର ନିଜ ସମସ୍ୟାର ସମାଧାନ ପାଇଁ ଅଞ୍ଚଳବାସୀ ବିଜେଡି ଦଳର ପ୍ରାର୍ଥୀଙ୍କ ଉପରେ ଭରସା କରି ତାଙ୍କୁ ବିପୁଳ ସଂଖ୍ୟାରେ ଭୋଟ ଦେଇ ଜୟଯୁକ୍ତ ମଧ୍ୟ କରାଇଥଲେ । ହେଲେ ସବୁଥର ଭଳି ନିର୍ବାଚନ ସରିଗଲା ପରେ ପ୍ରତିଶ୍ରୁତି ପାଲଟିଗଲା ପାଣିର ଗାର । ଏପରିକି ଯେଉଁ ଜାଗାରେ ବସ୍ତିର ନା ନଥିଲା ସେଠାରେ ନୂଆ ବସ୍ତି ଗଢ଼ିଉଠିବା ସହ ରାସ୍ତା ଘାଟ, ନାଳ ନର୍ଦମା ଓ ପାନୀୟ ଜଳ ଭଳି ମୌଳିକ ବ୍ୟବସ୍ଥା ମଧ୍ୟ ହୋଇଛି l ହେଲେ ଯେଉଁ ସ୍ଥାନରେ ଏ ସମସ୍ତ ମୌଳିକ ସୁବିଧାର ଆବଶ୍ୟକତା ରହିଛି ସେହି ସ୍ଥାନରେ କୌଣସି ଉନ୍ନତି ମୂଳକ କାର୍ଯ୍ୟ ହୋଇ ନଥିବା ଅଭିଯୋଗ କରିଛନ୍ତି ଅଞ୍ଚଳବାସୀ । ଏପରିକି ବାରମ୍ବାର ବିଜ୍ଞାପିତ ଅଞ୍ଚଳ ପରିଷଦରେ ଗୁହାରି କରିବା ସହ ତତ୍କାଳୀନ ମନ୍ତ୍ରୀଙ୍କୁ ଗୁହାରି କଲେ ସୁଦ୍ଧା ତାଙ୍କ ବେଦନା ଦୂର ହୋଇପାରିନି l ଏଣୁ ଚଳିତ ଥର ପ୍ରଥମେ ଯିଏ କାମ କରି ଦେଖାଇବ ଅଞ୍ଚଳବାସୀ ତାଙ୍କୁ ବିଜୟ ମୁକୁଟ ପିନ୍ଧାଇବେ ବୋଲି କହିଛନ୍ତି l ତେବେ ଦେଖିବାକୁ ବାକି ରହିଲା ଅଞ୍ଚଳର ଉନ୍ନତି କରୁଛି କିଏ ଏବଂ ଭୋଟ ନେଉଛି କିଏ ।

କୋଟପାଡ଼ରୁ ସୁନୀଲ ଦାଶ