ସରପଞ୍ଚ ପଦବୀ ପାଇଁ ଜନତାଙ୍କ ପ୍ରଥମ ପସନ୍ଦ ଚିତ୍ରସେନ ଘୋଷ…
ଇଲେକ୍ସନ ଭିତରେ ସିଲେକ୍ସନ, ଚର୍ଚ୍ଚାରେ କଞ୍ଚଣା ପଞ୍ଚାୟତ । ଖଲ୍ଲିକୋଟ ପଞ୍ଚାୟତ ନିର୍ବାଚନ ପାଇଁ ଏବେ ସବୁ ଗାଁ ଓ ପଞ୍ଚାୟତରେ ସରଗରମ ରହିଛି ରାଜନୀତି । ତେବେ ଏଭଳି ଗୋଟିଏ ପଞ୍ଚାୟତ ରହିଛି ଯେଉଁଠି ଭୋଟର ଦୀର୍ଘ ସମୟ ଧରି ଗୋଟିଏ ପରିବାର ଉପରେ ଆସ୍ଥା ପ୍ରକଟ କରି ଆସୁଛନ୍ତି । ଅର୍ଥାତ୍ ଗୋଟିଏ ପରିବାରର ସଦସ୍ୟ ମାନେ ଦୀର୍ଘ ୨୫ ବର୍ଷ ଧରି ଉକ୍ତ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ପଦବୀରେ ରହି ଆସିଛନ୍ତି । ଚଳିତ ଯୋଜନାରେ ମଧ୍ୟ ସେହି ପରିବାରର ସଦସ୍ୟଙ୍କୁ ସରପଞ୍ଚ ଓ ସମିତି ସଭ୍ୟ ଭାବେ ଦେଖିବାକୁ ଚାହୁଁଥିବା କହିଛନ୍ତି ପଞ୍ଚାୟତର ଭୋଟର ।
ଗଂଜାମ ଜିଲ୍ଲା ଖଲ୍ଲିକୋଟ ବ୍ଲକର କଞ୍ଚଣା ପଞ୍ଚାୟତ । ଉତ୍ତମ ପରିବେଶ, ମୌଳିକ ସୁବିଧା ସୁଯୋଗ, ଦୁର୍ନୀତି ମୁକ୍ତ ପଞ୍ଚାୟତ ଭାବେ କେବଳ ଖଲ୍ଲିକୋଟ ବ୍ଲକ କାହିଁକି ପୁରା ଗଂଜାମ ଜିଲ୍ଲାରେ ଚର୍ଚ୍ଚା ହୋଇଥିବା ଏହି ପଞ୍ଚାୟତ ଏବେ ପୁଣି ଥରେ ଚର୍ଚ୍ଚାର ପରିସରଭୁକ୍ତ ହୋଇଛି । ଚଳିତ ନିର୍ବାଚନରେ ସରପଞ୍ଚ ପଦବୀ ମହିଳାଙ୍କ ପାଇଁ ସଂରକ୍ଷିତ ଥିବା ବେଳେ ସମିତି ସଭ୍ୟ ପଦବୀ ଅଣସଂରକ୍ଷିତ ରହିଛି । ତେବେ ସରପଞ୍ଚ ଓ ସମିତି ସଭ୍ୟ ପଦବୀ ପାଇଁ ଉକ୍ତ ପଞ୍ଚାୟତର ଅଗଣିତ ଭୋଟରଙ୍କ ମତାମତ ନେଇଛନ୍ତି ବର୍ତ୍ତମାନର ସରପଞ୍ଚ ଚିତ୍ରସେନ ଘୋଷ ।
ଲୋକଙ୍କ ମତାମତକୁ ନେଇ ସେ ଯାହା କିଛି କରିବେ ବୋଲି କହିଥିବା ବେଳେ ଭୋଟର ମାନେ ପୁଣିଥରେ ପଞ୍ଚାୟତ ଦାୟିତ୍ବ ନେବାକୁ ତାଙ୍କୁ ଅନୁରୋଧ ମଧ୍ୟ କରୁଥିବା ଜଣାପଡିଛି । ଦୁର୍ନୀତି ଅଭିଯୋଗ ଉପରେ ଦୃଢ଼ କାର୍ଯ୍ୟାନୁଷ୍ଠାନ, ଏ ନେଇ ସଚେତନତା ଫଳକ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଲଗାଇବା, ପୁରା ପଞ୍ଚାୟତରେ ସ୍ବଚ୍ଛ ଓ ସୁନ୍ଦର ପରିବେଶ ସୃଷ୍ଟି କରିଥିବା ସରପଞ୍ଚ ଚିତ୍ରସେନଙ୍କୁ ପୁଣି ଥରେ ଅକୁଣ୍ଠ ସମର୍ଥନ କରିବାକୁ ଯୋଜନା କରୁଛନ୍ତି ପଞ୍ଚାୟତର ସାଧାରଣ ଜନତା । ଅପରପକ୍ଷେ ବିରୋଧୀ ଗୋଷ୍ଠୀ ପକ୍ଷରୁ ମଧ୍ୟ କାଁ ଭାଁ ବିରୋଧ କରାଯାଉଥିବା ବେଳେ ପ୍ରାର୍ଥୀ ଦିଆଯିବାକୁ ସ୍ଥିର ହୋଇଥିବା ଶୁଣାଯାଉଛି । ଏକାଧାରରେ କହିବାକୁ ଗଲେ ଏହି ପଞ୍ଚାୟତ ଅନ୍ୟ ପଞ୍ଚାୟତ ଗୁଡିକ ପାଇଁ ଆଦର୍ଶ ପାଲଟିଥିବା ବେଳେ ଏହି ନିର୍ବାଚନରେ ଜନତା ଜନାର୍ଦ୍ଦନ କି ନିଷ୍ପତ୍ତି ନେଉଛନ୍ତି ତାହା ଦେଖିବାକୁ ବାକି ରହିଲା ।
ବେଗୁନିଆପଡାରୁ ବପୁନି କୁମାର ମାଲୁ
