‘ତୋ ବିନା ଭଲ ଲାଗେନା’ …
ମିହିର ଦାସ । କେବଳ ନାମ ହିଁ ଯଥେଷ୍ଟ । ଓଡିଆ ଚଳଚିତ୍ର ଜଗତର ଖୋଲା ଆକାଶର ଉଜ୍ବଳମୟ ତାରକା ଥିଲେ ସେ । ଛୋଟ ପରଦା ହେଉ କି ବଡ ପରଦା ସବୁଠି ରହିଥିଲା ତାଙ୍କର କ୍ରେଜ୍ । ଲୋକେ ତାଙ୍କୁ ଯେ କେବଳ ନାୟକ ରୂପରେ ଗ୍ରହଣ କରିଛନ୍ତି ତାହା ନୁହେଁ ସେ ଖଳନାୟକ ଭୂମିକା ହେଉ ଅବା କମେଡିଆନ ସବୁ ଚରିତ୍ରରେ ତାଙ୍କର ବଳିଷ୍ଠ ଅଭିନୟ ଲୋକଙ୍କ ହୃଦୟକୁ ଜିଣିପାରିଛି । ଦର୍ଶକଙ୍କ ମନରେ ଆଜିବି ଗୋଟିଏ ପ୍ରଶ୍ନ ରହିଛି ଯେ, ମିହିର ଦାସଙ୍କୁ ନାୟକ କୁହାଯିବ ନା ଖଳନାୟକ ? କମେଡିଆନ୍ କୁହାଯିବ ନା ଜଣେ ଭଲ ଅଭିନେତା ? କାରଣ ସବୁ ଚରିତ୍ରକୁ ଅତି ନିଖୁଣତାର ସହ ଅଭିନୟ କରିପାରନ୍ତି ଓଲିଉଡର ଏହି ଭେଟେରାନ୍ କଳାକାର ।
ଦୀର୍ଘ ୪ ଦଶନ୍ଧି ଧରି ନିଜ କଳା ଓ ଅଭିନୟର ଯାଦୁଗରୀରେ ଓଡ଼ିଆ ସିନେପ୍ରେମୀଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ଅକ୍ତିଆର କରିଛନ୍ତି ସେ । କେବେ କାକା ହୋଇ ‘ଅଭିମନ୍ୟୁ’କୁ ବୁଝାଇଛନ୍ତି ପୁଣି କେବେ ‘ପୁଅ ଭୋଳାଶଙ୍କର ହୋଇ’ ମାଆର ପଣତକାନୀରେ ମୁହଁ ପୋଛିଛନ୍ତି । କେବେ ‘କ୍ରିଷ୍ଣା କାବେରୀ’ ସିନେମାରେ କାବେରୀ ସ୍ନେହରେ ବାନ୍ଧି ହୋଇଛନ୍ତି ପୁଣି କେବେ ‘ରାଖି ବାନ୍ଧିଲି ମୋ ରଖିବ ମାନ’ରେ ଭଉଣୀକୁ ରାଖିର ମାନ ଦେଇଛନ୍ତି । ତ କେବେ ସିଲଭର ସିଟି ‘କଟକ’ ସହରରେ ଚଲାଇଥିଲେ ରାଜୁତି ।
ମଥୁରା ବିଜୟରୁ କ୍ୟାରିଅର ଆରମ୍ଭ କରିଥିବା ଭେଟେରାନ୍ ଅଭିନେତା ମିହିର ଦାସ ଆଜି ୬୩ ବର୍ଷ ବୟସରେ ‘ଜୀବନ ମୃତ୍ୟୁ’ର ଯୁଦ୍ଧରେ ପରାଜୟ ହୋଇଯାଇଛନ୍ତି । ଦୀର୍ଘଦିନରୁ କିଡନୀ ଓ ହୃଦରୋଗରେ ପୀଡିତ ହୋଇ ଚିକିତ୍ସା ହେଉଥିଲେ କିନ୍ତୁ ନିକଟରେ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ଏକ ଘରୋଇ ହସ୍ପିଟାଲରେ ଭେଣ୍ଟିଲେଟରରେ ଚିକିତ୍ସା କରାଯାଉଥିଲା । ହେଲେ ଏହି ‘ହସ ଲୁହ ଭରା ଦୁନିଆ’ରେ ‘ଭାଗ୍ୟ ହାତେ ରହିଛି ଡୋରି’ । ଶେଷରେ ସମୟର ଚକାଭଉଁରୀ ଖେଳରେ ହାରିଗଲେ ମିହିର ଦାସ ।
ଅଭିନୟର ଦୁର୍ବଳତା ତାଙ୍କୁ ନିଜ ଜିଲ୍ଲା ମୟୁରଭଞ୍ଜରୁ ଟାଣିଆଣିଥିଲା କଟକ । ଆଉ ସିଲଭର ସିଟି କଟକ ମିହିରଙ୍କୁ ବନେଇଦେଲା ଓଲିଉଡର ହୀରା । ଜୀବନର ଯାତ୍ରାରେ କଣ୍ଠଶିଳ୍ପୀ ସଙ୍ଗୀତା ଦାସଙ୍କ ହାତ ଧରିଥିଲେ ମିହିର, କିନ୍ତୁ ୨୦୧୦ ମସିହାରେ ମିହିରଙ୍କ ହାତଛାଡି ସେ ଆରପାରିକୁ ଚାଲିଯାଇଥିଲେ । ଏକାକୀ ପୁଅ ତଥା ଅଭିନେତା ଅମ୍ଳାନଙ୍କୁ ଶିଶୁରୁ ବଡ଼ କରିଥିଲେ ମିହିର । ଯେଉଁଥିପାଇଁ କେବଳ ପରଦାରେ ନୁହେଁ, ବାସ୍ତବ ଜୀବନରେ ମଧ୍ୟ ସେ ଜଣେ ଭଲ ବାପା ଥିଲେ । ଆଜି ତାଙ୍କର ଦେହାନ୍ତରେ କେବଳ ମିହିରଙ୍କ ପରିବାର କିମ୍ୱା ଓଲିଉଡ୍ ନୁହେଁ, କାନ୍ଦୁଛି ପୁରା ଓଡ଼ିଶା, ଝୁରୁଛି ସିନେମା ହଲ୍ ।
୧୯୮୦ ମସିହାରେ ମୁକ୍ତିଲାଭ କରିଥିବା ଚଳଚ୍ଚିତ୍ର ‘ରାମାୟଣ’ରେ ସେ ଶତ୍ରୁଘ୍ନ ଭୂମିକାରେ ଅବତୀର୍ଣ୍ଣ ହୋଇ ସିନେ-ଅଭିନୟ ଯାତ୍ରା ଆରମ୍ଭ କରିଥିଲେ । ପ୍ରାୟ ୨୦୦ରୁ ଉର୍ଦ୍ଧ୍ବ ଚଳଚ୍ଚିତ୍ରରେ ଭିନ୍ନ ଭିନ୍ନ ଚରିତ୍ରରେ ଅଭିନୟ କରିଛନ୍ତି ମିହିର ଦାସ । ଅଭିନୟରେ ସଫଳତାର ଶୀର୍ଷରେ ପହଞ୍ଚିବା ପରେ ସେ ରାଜନୀତିକୁ ଆସିଥିଲେ । ୨୦୧୪ ସାଧାରଣ ନିର୍ବାଚନ ଅବ୍ୟବହିତ ପୂର୍ବରୁ ସେ ବିଜୁ ଜନତା ଦଳରେ ଯୋଗ ଦେଇ ଦଳ ଲାଗି ପ୍ରଚାର କରିଥିଲେ । ପରେ ସେ ବିଜେଡି ପରିତ୍ୟାଗ କରି ୨୦୧୮ ମସିହାରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ୨୦୧୯ ନିର୍ବାଚନରେ ସେ ବିଜେପି ପ୍ରାର୍ଥୀଙ୍କ ସମର୍ଥନରେ ପ୍ରଚାର ମଇଦାନକୁ ଓହ୍ଲାଇ ଥିଲେ ।
ମିହିର ଦାସ ନିଜର ବଳିଷ୍ଠ ଅଭିନୟ ପାଇଁ ଅନେକ ଥର ଶ୍ରେଷ୍ଠ ଅଭିନେତାର ପୁରସ୍କାର ପାଇଛନ୍ତି । ୧୯୯୮ ମସିହାରେ ‘ଲକ୍ଷ୍ମୀ ପ୍ରତିମା’, ୨୦୦୫ରେ ଫିଲ୍ମ ‘ଫେରିଆ ମୋ ସୁନା ଭଉଣୀ’ ପାଇଁ ସେ ବେଷ୍ଟ ଆକ୍ଟର ପୁରସ୍କାର ଜିତିଥିଲେ । ତା ସହିତ ୨୦୦୨ରେ ନିର୍ମାଣ ହୋଇଥିବା ଫିଲ୍ମ ‘ରାଖି ବାନ୍ଧିଲି ମୋ ରଖିବ ମାନ’ ଓ ଫିଲ୍ମ ‘ପ୍ରେମ ଅଢେଇ ଅକ୍ଷର’ ପାଇଁ ସେ ବେଷ୍ଟ ସପୋର୍ଟିଂ ଆକ୍ଟର ଭାବେ ମଧ୍ୟ ସମ୍ମାନିତ ହୋଇଥିଲେ ।
ତାଙ୍କର ଅକାଳ ବିୟୋଗ ଓଡିଆ ସିନେ ଜଗତରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି କରିଛି । ଯାହାକୁ କେହି ବି କେବେ ହେଲେ ପୂର୍ଣ୍ଣ କରିପାରିବେ ନାହିଁ । ତାଙ୍କ ଅବର୍ତ୍ତମାନରେ ସେହି ଉଜ୍ବଳତମ ପ୍ରତିବାକୁ ଶତ କୋଟି ପ୍ରଣାମ ।
