ଅଙ୍ଗାର ପାଲଟିଗଲା ୬୮ ଏକର ଧାନ, କ୍ଷତିପୂରଣ ଦାବି କଲେ ଚାଷୀ

ନିଆଁ ଲାଗି ଅଙ୍ଗାର ପାଲଟିଗଲା ୧୮ ଟି ପରିବlରର ୬୮ ଏକର ଧାନ । ଢେଙ୍କାନାଳ ଜିଲ୍ଲା ହିନ୍ଦୋଳ ଏନଏସିର ୩ ନଂ ୱାର୍ଡ ଚମ୍ପତି ସାହିକୁ ଲାଗି ରହିଥିବା କ୍ଷେତରୁ କଟା ଯାଇଥିବା ଧାନ ଫସଲ ରାସ୍ତା ପାର୍ଶ୍ଵରେ ଗଦା ହୋଇ ରହିଥିବା ବେଳେ ସେଥିରେ ନିଆଁ ଲାଗି ସବୁ ଜଳି ଯାଇଥିବା ଦେଖିବାକୁ ମିଳିଛି । ତେବେ ନିଆଁ କିଭଳି ଲାଗିଲା ତାହା ସ୍ପଷ୍ଟ ହୋଇ ନାହିଁ । ଅପରପକ୍ଷେ ଗ୍ରାମବାସୀ ନିଆଁ ଲାଗିଥିବା ଖବର ତୁରନ୍ତ ନିକଟସ୍ଥ ଦମକଳ ଅଫିସରେ ଜଣାଇଥିଲେ । ଦମକଳ ଅଫିସ ନିଆଁ ଲାଗିଥିବା ସ୍ଥାନରୁ ମାତ୍ର ୧ କିଲୋମିଟର ଦୂରରେ ଥିବାବେଳେ ଦୀର୍ଘ ସମୟ ଧରି ସେଠାରେ ଅଗ୍ନିଶମ ବାହିନୀ ନ ପହଞ୍ଚିବାରୁ ସାଧାରଣରେ ଅସନ୍ତୋଷ ଦେଖାଦେଇଥିଲା ।  ଅଗ୍ନିଶମ ବାହିନୀ ବିଳମ୍ବରେ ପହଞ୍ଚି ନିଆଁ ଲିଭାଇବା ବେଳକୁ ଚାଷୀ ମାନଙ୍କର ଧାନ ଫସଲ ପୋଡି ପାଉଁଶ ହୋଇଯାଇଥିଲା । ଗାଁର ୧୮ ଜଣ ଚାଷୀଙ୍କ ୬୮ ଏକରରୁ ଉର୍ଦ୍ଧ୍ବ ଜମିର ଧାନ ଫସଲ ପୋଡି ନଷ୍ଟ ହୋଇଯାଇଥିବା ସୂଚନା ମିଳିଛି ।

ସୂଚନା ଅନୁସାରେ ଗତ ୨- ୩ ଦିନ ତଳେ ସାହିର ଚାଷୀମାନେ ମିଳି ମିଶି ନିଜ ନିଜର ଜମିରୁ ଧାନ କାଟି ବିଡା ଗୁଡିକୁ ରାସ୍ତା ପାର୍ଶ୍ଵରେ ପୃଥକ ପୃଥକ ଗଦା କରି ସାଇତି ରଖିଥିଲେ । ତେବେ ଦ୍ବିପ୍ରହର ସମୟରେ ହଠାତ ଧାନ ଗଦା ହୁ ହୁ ହୋଇ ଜଳୁଥିବା ଦେଖି ସ୍ଥାନୀୟ ଲୋକ ତୁରନ୍ତ ଅଗ୍ନିଶମ ବାହିନୀଙ୍କୁ ଖବର ଦେଇଥିଲେ । ଦୀର୍ଘ ସମୟ ଧରି ଅଗ୍ନିଶମବାହିନୀର କର୍ମଚାରୀ ଘଟଣା ସ୍ଥଳରେ ନପହଞ୍ଚିବାରୁ ଚାଷୀମାନଙ୍କ ମଧ୍ୟରେ ଉତେଜନା ପ୍ରକାଶ ପାଇଥିଲା । ଫଳରେ କ୍ଷତିପୂରଣ ଦାବିରେ ହିନ୍ଦୋଳ – ମଇଧରପୁର ରାସ୍ତାକୁ ଅବରୋଧ କରି ରଖିଥିଲେ ଚାଷୀ । ଖବର ପାଇ ହିନ୍ଦୋଳ ତହସିଲଦାର ସୁଶାନ୍ତ କୁମାର ମିଶ୍ର ଘଟଣା ସ୍ଥଳରେ ପହଞ୍ଚି ରାଜସ୍ୱ ନିରୀକ୍ଷକଙ୍କ ଜରିଆରେ କ୍ଷୟକ୍ଷତିର ଆକଳନ କରିବା ପରେ ସରକାରୀ ସହାୟତା ଯୋଗେଇଦେବାର ପ୍ରତିଶୃତି ଦେବା ପରେ ଆନ୍ଦୋଳନରତ ଚାଷୀ ରାସ୍ତା ଅବରୋଧରୁ ହଟିଥିଲେ ।

ହିନ୍ଦୋଳରୁ ସୁଜିତ କୁମାର ବେହେରା