ରାଜ୍ୟରେ ଉଦଘାଟିତ ହେବ ପ୍ରଥମ ମିଲକ୍ ବ୍ୟାଙ୍କ
ଆସନ୍ତା ଜାନୁଆରୀ ୨୬ରେ ଉଦଘାଟିତ ହେବ କ୍ୟାପିଟାଲ ହସ୍ପିଟାଲ ମିଲକ୍ ବ୍ୟାଙ୍କ । ଉଦଘାଟନ ପରେ ଏହା ରାଜ୍ୟର ପ୍ରଥମ ମିଲକ୍ ବ୍ୟାଙ୍କ ହେବ । ଏଥିପାଇଁ ଆବଶ୍ୟକୀୟ ଭିତ୍ତିଭୂମି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ଡାକ୍ତର ଓ କର୍ମଚାରୀ ତାଲିମ ନେଇ ସାରିଛନ୍ତି । ଜାତୀୟ ସ୍ବାସ୍ଥ୍ୟ ମିସନ୍ ଜରିଆରେ ଖୋଲିବ ଏହି ମିଲକ୍ ବ୍ୟାଙ୍କ । କ୍ୟାପିଟାଲ ହସ୍ପିଟାଲର ଶିଶୁ ୱାର୍ଡରେ ନିକଟରେ ଇନ୍ଫାଣ୍ଟ ଆଣ୍ଡ ୟଙ୍ଗ ଚାଇଲ୍ଡ ଫିଡିଂ ସେଣ୍ଟର୍ କାର୍ଯ୍ୟକ୍ଷମ ହୋଇଛି । ଏଥିରେ ଜନ୍ମରୁ ୬ମାସ ପର୍ଯ୍ୟନ୍ତ ଶିଶୁଙ୍କୁ ସ୍ବତନ୍ତ୍ର ସ୍ତନ୍ୟପାନ ଉପରେ ଗୁରୁତ୍ବ ଦିଆଯାଇଛି । ପରବର୍ତ୍ତୀ ସମୟରେ ଏହି କେନ୍ଦ୍ରକୁ ମିଲକ୍ ବ୍ୟାଙ୍କରେ ପରିଣତ କରିବା ପାଇଁ ଯୋଜନା ହୋଇଥିଲା । ଗତ ୨ବର୍ଷରୁ ଅଧିକ ସମୟ ଧରି ଏଥିପାଇଁ ପ୍ରସ୍ତୁତି ଚାଲିଥିଲେ ମଧ୍ୟ କୋଭିଡ ପାଇଁ ଏହାର ଉଦଘାଟନ ବିଳମ୍ବିତ ହୋଇଥିଲା ।
ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ ବା ଏନଏଫଏଚଏସରେ ଗ୍ରାମାଞ୍ଚଳ ଅପେକ୍ଷା ସହରାଞ୍ଚଳରେ ରହୁଥିବା ମା’ମାନେ ନିଜ ଶିଶୁକୁ ସ୍ତନ୍ୟପାନ ଅପେକ୍ଷା ଡବାକ୍ଷୀର ଦେବାକୁ ଅଧିକ ପସନ୍ଦ କରୁଛନ୍ତି । ଏପରିକି କର୍ମଜୀବୀ ମା’ମାନଙ୍କ କ୍ଷେତ୍ରରେ ଏହା ଅଧିକ ମାତ୍ରାରେ ଦେଖିବାକୁ ମିଳୁଛି । ଫଳରେ ଏଥିଯୋଗୁଁ ଉଭୟ ଶିଶୁ ଓ ମା’ମାନଙ୍କ ପ୍ରତି ବିପଦ ରହୁଛି । ତେବେ ସେମାନଙ୍କୁ ସ୍ତନ୍ୟପାନ ପାଇଁ ଉତ୍ସାହିତ କରିବାରେ ଏହି ବ୍ୟାଙ୍କ ସହାୟକ ହେବ ।
